"Әни" дигән олы сүз бар
Әни, әнием... Күпме наз, ярату, чиксез мәхәббәт сыйган бу сүзләргә. Өч хәрефтән генә торган бу сүздә күпме җылылык һәм күңел тойгысы!
Әни кулы җир йөзендә иң җылысы, әни елмаюы - иң сөйкемлесе.Безнең өчен күпме борчулы көннәр, йокысыз төннәр үткәрә бит алар. Җан җылысын биреп, һәр адымыбызга сөенеп, дөньяны танырга өйрәтүче газиз әниләр! Менә инде 12 ел ноябрьнең соңгы якшәмбесендә без шатлыклы, матур һәм җылы бәйрәм - Әниләр көнен билгеләп үтәбез. Алар моңа бик тә лаек.
Кадерле Әниләребез!
Сезгә йөрәгебездән ташып чыккан ярату, рәхмәт сүзләрен җиткерәбез.Изгелекләрегез, кайгыртучанлыгыгыз, ярдәмегез, безне аңлавыгыз өчен мең-мең рәхмәт сезгә! Исән-сау булыгыз, гомерегез буе безгә таяныч, юаныч булып, кадер-хөрмәткә күмелеп яшәгез.
Күңелләрдә сезгә тик изге теләк.
Бер-беребез өчен без бик кирәк.
Тормышыбыз ямьле булсын дисәк,
Матур сүзләр әйтик күбрәк.
Куллары алтын аның,
Гел эшләп тора үзе.
Яхшы билгеләр алсам,
Кояш күк балкый йөзе.
Киң күңелле, мәрхәмәтле,
Нур чәчеп тора күзе,
Колагымда гел яңгырый:
"Кеше бул!"-дигән сүзе.
Инзилә Фәйзуллина
Һич беркайчан зарланмый ул,
Йомшак , татлы сүзләре.
Кояш сыман балкый йөзе,
Наз даръясы- күзләре.
Безнең кеше булып үсү-
Аның иң зур теләге.
Иман,тәүфыйк теләп кенә
Тибә аның йөрәге.
Вөҗдан, намус, имин тормыш-
Бәхет иленә ачкыч.
Әниемнең теләкләре
Барыр юлда таяныч.
Таңсылу Сәфәргалиева
Минем әнием булдыклы,
Ул һәр эштә бик тырыш.
һәр көнне миңа аңлата:
Улым ,укырга тырыш!
Әни мине бик ярата,
Мин дә аны яратам.
Бәйрәме белән котлыйм, дип,
Бүләк эзләп баш ватам.
Илназ Фәйзуллин
Әнием минем бик матур,
Нур чәчә кояш кебек.
Янып тора битләре,
Караса безгә көлеп.
Әниемнең татлы сүзен
Ишетеп туймыйм әле.
Шигыремне бүләк итеп
Бирергә уйлыйм әле.
Ләйсән Шакирова
Әнием, син булмасаң,
Юк бит ашның тәме дә,
Әнием, син булмасаң,
Юк бит өйнең яме дә.
Зиатдинова Ләйлә
Телендә һәрвакытта
Матур, тәмле сүз аның.
Кулларында эш булса,
Йөрәгендә без аның.
Рәзил Хафизов
Кояш гомере телим мин, Әнием , сиңа!..
Кояш гомере телибез һәрберегезгә!..
|
